Kant: Briefwechsel, Brief 772, Von Iacob Lindblom.

     
           
 

 

 

 

 

  
  Von Iacob Lindblom.      
           
  13. Aug. 1797.      
           
         
  Viro      
  Omnibus titulis majori      
  Immanueli Kant      
  S. P. D.      
  Jacobus Lindblom      
  Episcopus Dioeces. OstroGothicae      
  in Svecia.      
         
           
         
  Patiaris, Vir celebratissime, ignotum nomen Tibi ante oculos      
  poni. Non ingentia Tua in scientias merita concelebraturus praesentem      
  me steti; illa enim venerabunda mente, qvam verbis colere      
  mihi magis convenit, cum Te principem & antesignanum suum totus      
  suspicit doctorum ordo.      
         
           
         
  Alia omnino caussa, nec illa Tibi ut spero ingrata, memet, ut      
  Te adirem commovit. Scilicet qvod olim Homero, longe post sua      
  fata, evenisse ferunt, ut plures urbes, sibi qvaeqve decus natalium      
  vindicantes, de patria Principis Poëtarum contenderent, id Tibi      
  Philosophorum Principi vivo dudum contigit. Svecia nempe nostra      
  & in illa, Dioecesis, cui praesum, OstroGothica, non majores tantum      
  Tuos fovisse, sed et Parentem Tuum educasse gloriae sibi ducit.      
  Nec temere hanc sibi laudem adsciscere videtur, si modo verum,      
  Te parente ortum, qvi stipendia in castris Svecanis circa initium      
  seculi fecerat, anteqvam in Germanica transiret. Is nempe miles      
           
  (+D Unter Officier + dicunt) patre ortus dicitur agricola, in territorio      
  Tjustiae Septentrionalis, qvod partem constituit Provinciae Smolandiae,      
  Dioecesi Lincopiensi subjectam, sedem habente. Qvatuor fratres      
  habuit, inter qvos Parens Tuus ordine tertius fuit. Bini majores      
  natu agriculturae sese in eodem natali Territorio addixerunt, ex minoribus      
  vero alter Holmiam, nescio qvo consilio, concessit, alter      
  vero scriba cohortis eqvestris (+D Muster Schreiber +) non procul a patriis      
  laribus sedem fixit.      
         
           
         
  Ex his supersunt, qvantum ego qvidem, per breve illud spatium,      
  qvo haec mihi innotuerunt, expiscari potui, (forte plurimi ex fratribus      
  agricolis oriundi) filia & nepos qvarti fratris, nec non nepos      
  qvinti, juvenis bonae spei, qvi Musicam exercet, nec procul ab urbe      
  nostra commoratur, organistae vices Vitrici loco obiens.      
         
           
         
  Horum Te, Vir summe, certiorem facere volui, ut qvae ipse,      
  de genere Tuo scires, benigne mihi communicares, atqve sic demum      
  constaret, qvo jure Svecia & Tjustia qvoqve Te suum sibi vindicent.      
  Ego vero ipse Tjustia oriundus, inter gloriae titulos habebo, si hoc      
  saltim commune cum Viro, tantum, non supra meam solum, sed      
  laudatissimorum hominum sortem eminenti, habuerim. Vale! O!      
  utinam seculo, cujus decus es, diu intersis!      
         
           
  A Dabam Lincopiae die XIII Aug. A. MDCCXCVII .      
           
  P. S. Wenn ich mit Dero Zuschrifft sollte geehrt werden, wie ich      
  hertzlich wünsche, so ist die addresse über Hamburg auf Linköping in      
  Schweden.      
           
  Jacob Lindblom      
           
           
           
     

[ abgedruckt in : AA XII, Seite 194 ] [ Brief 771 ] [ Brief 772a ] [ Gesamtverzeichnis des Briefwechsels ]