Kant: Briefwechsel, Brief 851, Von Daniel Wyttenbach.

     
           
 

 

 

 

 

  
  Von Daniel Wyttenbach.      
           
  9 Febr. 1800.      
           
         
  Celeberrimo Viro Imm. Kant      
  Dan. Wyttenbach. S.      
         
           
         
  Vitae D. Ruhnkenii exemplum ut ad Te mitterem, Celeberrime      
  Vir, graves mihi sane fuerunt caussae. Primum necessitudo aetatis,      
  civitatis, condiscipulatus, quae Te Ruhnkeniumque pueros junxit,      
  qui ex Fridericiano Collegio ita produstis, ut viri existeretis, quamvis      
  in diverso uterque doctrinae genere, summi: et postea disjuncti      
  longo spatio veterem notitiam vel teneretis, vel recoleretis. Valuit      
  etiam meus ipse erga Te virtutesque tuas sensus et affectus, quia      
  Philosophia ad Literas profectus, utriusque instituendae disciplinae      
  per quatuordecim annos conjunctam sustinui provinciam: quo tempore      
  ingenii Tui lucem scriptis legendis tuis cognovi, non minore      
  meo cum fructu, quam grato erga Te animo: cujus animi Tibi      
           
  testificandi opportunitatem eo minus praetermittere potui. Accedit      
  porro, quod Tu, Ruhnkenii civis et condiscipulus, ipsius genus, facta,      
  plerasque res, certe in illa juvenili aetate, propius quam ego nosti:      
  ut de multis hujus libelli locis certiora me docere possis, quibus      
  aliquando ad alteram editionem instruendam utar. Quare et judicii      
  Tui de hoc libello cognoscendi caussa, et ut sciam recte eum ad Te      
  pervenisse, rogo Te ut, quod sine molestia tua fiat, mihi aliquid      
  Literarum rescribas: idque Germanica lingua. Nam quod ego ad      
  Te Latine scribo, contigit mihi, quod Ruhnkenio, ut a Germanica,      
  quamvis patria et nativa lingua ita desuescerem, ut ad ejus scribendae      
  facultatem non amplius satis valeam: quamquam lectionem cum      
  facilitate et oblectatione frequentem. Accipe igitur hunc librum,      
  Vir Celeberrime, ut Tibi debitum, et proprio meo, et communi      
  Ruhnkenii nomine. Et quandoquidem Te Deus illi superstitem esse      
  voluit, extendat Tibi vitam tempore, ut Tu eam porro extendas      
  factis. Vale.      
         
           
         
  Scripsi Lugdunibatavorum d. IX. Februarii. A. MDCCC .      
         
           
           
           
     

[ abgedruckt in : AA XII, Seite 297 ] [ Brief 850b ] [ Brief 851a ] [ Gesamtverzeichnis des Briefwechsels ]